सदगुरु माऊलींचे व त्यांच्या येणाऱ्या भक्तांचे छळ स्थानिक लोकांनी केले. पिण्याच्या पाण्यापासून ते पायवाटाही बंद केल्या. महाराजांना त्यांच्या परिवाराला भावकीतून गावातून बहिष्कृत करून वहाळीत टाकले. तेव्हा श्री स्वामींनी आपल्या भक्तांना होणारा त्रास पाहून पादुका स्थापना केल्या. १) गिरीश मर्तल, गाव कसाल ता. कुडाळ, २) धोंडू पुनाजी लांजवळ, गाव फणसगाव ता. देवगड, ३) दिगंबर घेवडे, गाव गुंजवणे ता. राजापूर यांच्या घरी पादुका स्थापना करून अनेक भक्तांना अभयवचन दिले. दरवर्षी मे महिन्यात मठातून मोठ्या दिमाखात वाजत गाजत भगवे झेंडे बहरत हजारो भक्तांच्या भेटीला स्वामी माऊलींची पालखी या स्थानांना भेट देते. अनेक भक्तांच्या विनंतीवर त्यांच्या गावोगावी पालखी भेट होत असते. हा कार्यक्रम दोन दिवस चालतो. पहाटे पालखी मठातून निघते व दुसऱ्या दिवशी सायंकाळी मठाला प्रदक्षिणा करून मठात विसावते. यानंतर पालखी थेट दत्तजयंतीलाच बाहेर पडते.