श्री दत्तावधूत क्षेत्र निखरे - राजापूर

                   सदगुरु श्री रामचंद्र महाराज यांनी श्री स्वामी समर्थ मठ निखरे – राजापूर या मठाची स्थापना या घरातच केली. त्यांच्या पूजेचे आणि साधनेचे स्थान महाराजांनी निर्माण केले आणि तेथेच आज गाभारा आहे. पूर्वी हे घर मातीच्या भिंती आणि कौलांचे छप्पर असणारे होते. साधारण दोनशे वर्षापूर्वीचे घर दिमाखात उभे होते. महाराजांना आणि त्यांच्या परिवाराला घरातून आणि गावातून पळवून लावण्यासाठी त्यांच्या घरभावकीतील महाराजांच्या मोठ्या भावाच्या मुलांनी भर पावसात छपरावर चढून कौले फोडली. त्यामुळे मातीच्या भिंती भिजून एका बाजूने अर्धे घर कोसळून पडले. परंतु महाराज ज्या बाजूला रहात होते त्या ठिकाणी अजिबात काहीच त्रास झाला नाही. अर्धी बाजू आपोआप वरच्यावर सावरून उभी राहिली. देव तारी त्याला कोण मारी याचा परिचय सदगुरु श्री दत्तात्रेयांनी दिला. सन 2015 – 16 साली चक्रीवादळ झाले. मठाच्या दोन्ही बाजूला दोन मोठी विशाल झाडे कोसळली. मात्र मठाला जराही धक्का लागला नाही. वास्तूला मोठा धोका निर्माण होऊ नये म्हणून त्या जागेवर आता स्वामी यांनी अनेक भाविकांच्या वस्तूरुपाचे मदतीने चिऱ्याचे दगडी बांधकाम करून तीन छपरे असणारे शिखरावर कलश स्थापित मठाचा जीर्णोद्धार केलेला आहे. सदगुरु श्री रामचंद्र महाराज यांनी या मठाची ट्रस्ट नोंदणी केली आणि त्याची नियमावली देखील महाराजांनीच लिहिली. मठाचे सार्वजनिक विश्वस्त संस्था नोंदणी क्रमांक रत्नागिरी 1104 ए असा आहे. या मठाद्वारे अनेक सार्वजनिक उपक्रम हाती घेतले जातात. अनेक लोकांना मोफत वैद्यकीय तपासणी, औषधोपचार, मार्गदर्शन, प्रवचन असे अनेक उपक्रम राबविले जातात. सदगुरु श्री स्वामी यांना हा मठ अशा पद्धतीने बांधायचा आहे, ज्यात सदगुरु श्री दत्तात्रेयांचे सर्व अवतार, महाविष्णूचे सर्व अवतार, महादेवाचे सर्व अवतार, शक्ती मातेचे सर्व अवतार असणारे विष्णू पीठ, शिव पीठ, शक्ती पीठ आणि गुरु पीठ एकत्रित असणारे बावन्न फूट उंचीचे समाधी मंदिर उभारण्याचा संकल्प आहे. त्याचबरोबर अत्याधुनिक हाॅस्पिटल निर्माण करायचे आहे, जेथे मोफत वैद्यकीय उपचार केले जातील. आपली संस्कृती, आपला धर्म सर्वांना कळण्यासाठी वेद शाळा निर्माण करायची आहे. अशी अनेक स्वप्न उराशी बाळगून श्री स्वामी घराचेच मंदिर बनवा, ही शिकवण घरोघरी राबवत आपला प्रवास अविरत करत आहेत.